मटिहानी (महोत्तरी) , १८ चैत ।

मुलुकभरिकै मठहरुको नायक मानिने महोत्तरीको मटिहानी–७ स्थित लक्ष्मीनारायण मठ (मटिहानीस्थान) मा नवनियुक्त उत्तराधिकारी महन्थले पदबहाली गर्नुभएको छ ।

नवनियुक्त उत्तराधिकारी महन्थ डा. रविन्द्र दास वैष्णवले आज सोमबार गुठी संस्थानका अधिकारी र सन्त समाजको उपस्थितिमा पदबहाली गर्नुभएको हो । डा. वैष्णवलाई गुठी संस्थान प्रधान कार्यालयले गत फागुन २२ गते सो पदमा नियुक्त गर्ने निर्णय गरेको हो ।

लामो समयदेखि नेतृत्वविहीन झैं रहेको मठले अब प्राज्ञिक व्यक्तित्व डा. वैष्णवको साथ पाएको छ । मुलुकका विभिन्न ठाउँमा गरी सयौं बिघा जग्गा, मठहरु, बगैंचा र भवनहरु लक्ष्मीनारायण मठको स्वामित्वमा छन् । मुलुकभरिका मठको नायक यस स्थानका महन्थलाई ‘मानमहन्थ’ भनिन्छ । अन्य मठका नयाँ महन्थलाई मटिहानी स्थानका मानमहन्थले ‘पगरी’ (शिरमा बाँधिने एक प्रकारको दोसल्ला वा गम्छा) दिने चलन छ । यस्तो ‘पगरी’ धारण गरेपछि कुनै पनि मठका महन्थले औपचारिक रुपमा सो पदबहाली गर्ने गर्छन् । लक्ष्मीनारायण मठका मानमहन्थ र उत्तराधिकारी महन्थको पदबहाली भने गुठी संस्थानले गर्दै आएको छ ।

विक्रम सम्वत् २०३८ सालमा महोत्तरीकै हालको मनराशिशवा–९ बथनाहामा जन्मनुभएका वैष्णवले संस्कृत साहित्यमा विद्यावारिधि गर्नुभएको छ । लक्ष्मीनारायण मठमा मठाधीश हुन मैथिल ब्राह्मण कूलको गृहस्थआश्रममा नगएका श्रीवैष्णव सम्प्रदायका सन्त नियुक्त गरिने चलन रहँदै आएको छ । अविवाहित रही ब्रह्मचर्य पालना गरेका सन्त नै यहाँका मठाधीश हुने पुरानो चलन हो ।

मठमा प्राज्ञिक व्यक्तित्व उत्तराधिकारी महन्थ नियुक्त भएपछि अब यहाँका धार्मिक गतिविधिले नियमितता पाउने सर्वसाधारणले आस पालेका छन् । उत्तराधिकारी महन्थ नै भावी मानमहन्थ हुने हुँदा डा. वैष्णव अब सो रोलक्रममा प्रवेश गर्नुभएको छ ।